Nyhende:

Steinras i Eidfjord – mann fekk steinblokk over seg

Fire menn som arbeidde med kraftlinjene ved Kjeåsen i Eidfjord stod fast på ei fjellhylle etter eit steinras, og måtte reddast ut med Sea King-helikopter.

AV Sara Finne
Publisert
Oppdatert:

Politiet fekk melding om eit steinras ved Kjeåsen i Eidfjord klokka 18.20 torsdag kveld. Ein mann i 40-åra som jobba med nokre kraftlinjer i området, vart treft av ei steinblokk då raset gjekk. 

– Han vart treft i rygg og skulder, slegen medvitslaus og kasta 6–8 meter ned før han landa på ei fjellhylle, seier operasjonsleiar Knut Dahl-Michelsen i Vest politidistrikt.

Redda ut av området

Mannen vart fyrst slegen medvitslaus, men vart deretter medviten att. Han og tre andre menn som også arbeidde i området stod fast på fjellhylla etter raset. Like etter klokka 21.00 melde politiet på Twitter at eit Sea King-helikopter hadde henta dei ut av området.

Det var utfordrande vêrforhold på staden.

Lettare skadd

Mannen som vart treft av steinblokken vart frakta til Haukeland universitetssjukehus.

– Men det ser ut til at det har gått greitt med han, trass alt. Før Sea King-helikopteret kom til staden fekk me heist ned helsepersonell til fjellhylla med luftambulansen. Og denne personen beskreiv mannen som vaken, stabil og klar, seier Dahl-Michelsen.

Dei tre andre mennene som sto fast på fjellhylla er uskadde, men var våte og kalde.

Helse Bergen opplyser i ei pressemelding torsdag kveld at mannen, som er 46 år, er lettare skadd. 

 

Lesarane si meining

Her kan du fritt koma med synspunkt og informasjon. Me krev fullt namn. Då vert det meir interessant for andre å lesa det du skriv. Trakassering, trugslar, hatske meldingar eller reklame vert ikkje akseptert på avisa-hordaland.no. Falske profilar vert utestengde. Ver sakleg og vis respekt når du kommenterer.